शिर्डी (प्रतिनिधी)-शिर्डी येथील
श्री साईबाबा संस्थान विश्वस्त व्यवस्था आणि ग्रीन अँड क्लीन शिर्डी फाऊंडेशन यांच्या संयुक्त विद्यमाने आयोजित ऐतिहासिक 'विश्व श्री साई स्पंदन' सोहळा, शनिवारी सायंकाळी अत्यंत उत्साहात आणि भक्तिमय वातावरणात पार पडला.
या सोहळ्याचे मुख्य आकर्षण म्हणजे 'डिजिटल साई दरबार' तंत्रज्ञानाच्या या अनोख्या उपक्रमाद्वारे देश-विदेशातील १,००० हून अधिक श्री साई मंदिरे आणि लाखो साईभक्त शिर्डीच्या पवित्र भूमीशी थेट जोडले गेले होते.
श्री साईबाबा संस्थानच्या श्री साईबाबा सांस्कृतिक भवनात ४०x२० फुटांची भव्य एलईडी स्क्रीन उभारण्यात आली होती. या स्क्रीनवर झूम द्वारे जोडलेली जगभरातील विविध मंदिरे आणि तेथील भाविक एकाच वेळी दिसत होते. यामुळे "भाविकांनी शिर्डीत साईबाबांचे दर्शन घेतले आणि शिर्डीने भाविकांच्या भक्तीचे दर्शन घेतले," असा एक अभूतपूर्व 'दुहेरी संवाद' साधला गेला. "एकाच वेळी, एकाच स्वरात, संपूर्ण विश्व या संकल्पनेनुसार, सायंकाळी ६:२० वाजता शिर्डीसह जगभरातील सर्व जोडलेल्या मंदिरांमध्ये एकाच वेळी 'श्री साईनाथ स्तवनमंजिरी'चे सामूहिक पठन करण्यात आले. यामुळे संपूर्ण वातावरण साईमय झाले होते.या जागतिक सोहळ्याच्या निमित्ताने आगामी 'शिर्डी परिक्रमा २०२६' ची अधिकृत घोषणा करण्यात आली. यावेळी परिक्रमेचा मार्ग, तारीख आणि महत्त्व विशद करणारे एक विशेष सादरीकरण करण्यात आले. कार्यक्रमाची सुरुवात दीप प्रज्वलनाने झाली. त्यानंतर श्री साईबाबा संस्थानचे मुख्य कार्यकारी अधिकारी श्री. गोरक्ष गाडीलकर आणि इतर मान्यवरांच्या उपस्थितीत जागतिक शांततेसाठी वैदिक मंत्रोच्चारात 'संकल्प' सोडण्यात आला.कार्यक्रमाचा समारोप महाआरतीने झाला. यावेळी एलईडी वॉलवर जगभरातील विविध मंदिरांमध्ये एकाच वेळी आरती होतानाचे दृश्य विलोभनीय होते. जे साईभक्त प्रत्यक्ष किंवा मंदिरात उपस्थित राहू शकले नाहीत, त्यांच्यासाठी या संपूर्ण सोहळ्याचे थेट प्रक्षेपण युट्यूब आणि इतर सोशल मीडिया माध्यमांवर करण्यात आले होते.
हा सोहळा यशस्वी करण्यासाठी श्री साईबाबा संस्थान आणि ग्रीन अँड क्लीन शिर्डी फाऊंडेशनच्या तांत्रिक टीम आणि स्वयंसेवकांनी विशेष परिश्रम घेतले.
0 Comments