शिर्डी (राजकुमार गडकरी)
शिर्डी एमआयडीसी व डिफेन्स क्लस्टरमुळे शिर्डी व सावळीविहीर परिसरात मोठ्या प्रमाणात रोजगार निर्माण होणार आहे, अजूनही विविध प्रकल्प येथे येणार आहे .त्यामुळे या परिसराचा विकास होणार आहे. असे सांगत महाराष्ट्रात मोठ्या प्रमाणात परकीय गुंतवणूकही वाढत आहे. असे मत राज्याचे उद्योगमंत्री ना.उदय सामंत यांनी विजयादशमीच्या दिवशी येथे व्यक्त केले.
राहाता तालुक्यातील सावळीविहीर येथे शिर्डी महाराष्ट्र राज्य औद्योगिक वसाहतीचे व डिफेन्स क्लस्टरचे भूमिपूजन उद्योगमंत्र्यांच्या हस्ते दसऱ्याच्या मुहूर्तावर संपन्न झाले. त्यावेळी ते बोलत होते. याप्रसंगी राज्याचे महसूलमंत्री तथा जिल्ह्याचे पालकमंत्री राधाकृष्ण विखे पाटील, आमदार आशुतोष काळे, अहिल्यानगर जिल्हा मध्यवर्ती सहकारी बँकेचे संचालक आण्णासाहेब म्हस्के पाटील, शिर्डी उपविभागीय अधिकारी माणिक आहेर, निबे लिमिटेडचे व्यवस्थापकीय संचालक गणेश निबे आदी उपस्थित होते.
शिर्डी औद्योगिक वसाहत ही एक राज्यात अव्वल दर्जाची अशी औद्योगिक वसाहत ठरणार आहे.
शिर्डी - सावळीविहीर (ता.राहाता) येथील शेती महामंडळाच्या लक्ष्मीवाडी मळ्यातील ५०२ एकर जागेवर ही शिर्डी एमआयडीसी साकारणार आहे. राहाता तालुक्यातील सावळीविहीर बु. व सावळीविहीर खु. तसेच कोपरगाव तालुक्यातील चांदेकसारे या गावांच्या क्षेत्रात या एमआयडीसीची ही जागा आहे. शासनाच्या जमिनीवर भूसंपादनाविना विकसित करण्यात येणारी ही राज्यातील पहिलीच एमआयडीसी ठरणार आहे. रस्ते आणि वीज विकासासाठी १०० कोटी रुपयांची मान्यता यापूर्वीच देण्यात आली आहे. शिर्डी औद्योगिक वसाहतीचे हे ठिकाण शिर्डी शहरापासून ५ किलोमीटर, समृद्ध महामार्गाच्या इंटरचेंजपासून केवळ ३ किलोमीटर व साईबाबा (शिर्डी) आंतरराष्ट्रीय विमानतळापासून १४ किलोमीटर अंतरावर आहे. रेल्वेमार्ग, नगर -मनमाड ,नाशिक- शिर्डी, संगमनेर- कोपरगाव आदी जवळचे रस्तेमार्ग, तसेच शिर्डी आंतरराष्ट्रीय विमानतळामुळे हवाईमार्गाने देशभरातील सर्व प्रमुख शहरांना अत्यंत सुलभतेने जोडणारी औद्योगिक वसाहत म्हणूनच भविष्यात उद्योजकांकडून चांगला प्रतिसाद अपेक्षित असल्याचे एमआयडीसी प्रशासनाचे म्हणणे आहे. शिर्डी एमआयडीसीत भूमिपूजन करण्यात आलेल्या
डिफेन्स क्लस्टरचे वैशिष्ट्य असे की,शिर्डी एमआयडीसीच्या २०० एकर जागेत हे क्लस्टर साकार होणार आहे. पुणे स्थित निबे लिमिटेड ही संरक्षण सामग्रीची निर्मिती करणारी कंपनी या डिफेन्स क्लस्टरमध्ये पहिला कारखाना उभारणार आहे. या कंपनीचे व्यवस्थापकीय संचालक गणेश निबे हे राहाता तालुक्यातील भूमिपुत्र आहेत. यामाध्यमातून एक हजार कोटींची गुंतवणूक होणार असून या क्लस्टरमध्ये शिर्डी व परिसरातील २ हजार तरूणांना थेट नवीन रोजगार उपलब्ध होणार आहे. अशा या डिफेंन्स क्लस्टर भूमिपूजन समारंभ प्रसंगी उद्योगमंत्री नामदार उदय सामंत पुढे म्हणाले की, येत्या काळात राज्यात पाच ठिकाणी डिफेंन्स क्लस्टर सुरू करण्यात येणार आहेत. यातील एक डिफेंन्स क्लस्टर शिर्डी औद्योगिक वसाहतीत सुरू करण्यात येत आहे. या डिफेन्स कलस्टरच्या माध्यमातून १ हजार २०० कोटींची गुंतवणूक होणार आहे. येत्या काळात शिर्डी बरोबर कोपरगाव शहरातही औद्योगिक वसाहत स्थापन करण्यात येईल, अशी ग्वाही त्यांनी दिली.
राज्य शासनाचे धोरण उद्योगां संदर्भात चांगले आहे. महाराष्ट्रात परकीय गुंतवणूक वाढत आहे. रत्नागिरी जिल्ह्यात ३० हजार कोटींचा सेमी कंडक्टर प्रकल्प सुरू होत आहे. यात ८० टक्के स्थानिक तरूणांना परदेशात प्रशिक्षण देऊन या प्रकल्पात कायम नोकरी दिली जाणार असल्याचेही यावेळी उद्योग मंत्री नामदार उदय सामंत यांनी सांगितले.
यावेळी राज्याचे महसूल मंत्री नामदार राधाकृष्ण विखे पाटील म्हणाले की, शिर्डी एमआयडीसीत अजूनही 25 30 नवीन मोठे प्रकल्प येणार आहेत. शिर्डी व परिसरातील युवकांसाठी नवा आशेचा किरण आहे. या माध्यमातून हजारो तरूणांना कायमस्वरूपी रोजगार मिळणार आहे. कोपरगावात एमआयडीसी उभारण्यासाठी शेती महामंडळाची ३०० एकर जागा विनाशूल्क उपलब्ध करून दिली जाईल, असे त्यांनी सांगितले.
शिर्डी एमआयडीसीमुळे शिर्डी, सावळीविहीर, राहाता, कोपरगाव या परिसरातील स्थानिक तरुणांना रोजगार उपलब्ध होईल. शिर्डी श्री साईबांबा देवस्थान म्हणून जगभर ओळखले जाते. यापुढे या ठिकाणी मोठ्या प्रमाणात उद्योग येणार असल्याने एक ‘औद्योगिक हब’ म्हणूनही शिर्डी उदयास येईल, असा विश्वासही पालकमंत्री ना.विखे पाटील यांनी यावेळी व्यक्त केला. तसेच महायुती सरकार विविध योजना राज्यात राबवत असून नागरिकांच्या खंबीरपणे पाठीमागे उभी आहे .नागरिकांनीही महायुतीच्या पाठीमागे खंबीरपणे उभे राहण्याची गरज आहे .असे सांगत अहमदनगर जिल्ह्यात महायुतीच्या जास्तीत जास्त जागा निश्चित येतील .असा ठाम विश्वासही त्यांनी यावेळी व्यक्त केला. आमदार आशुतोष काळे यांचेही यावेळी भाषण झाले. प्रास्ताविक गणेश निबे यांनी केले. या कार्यक्रमाला अधिकारी तसेच शिर्डी व परिसरातील बाळासाहेब जनार्दन जपे ,अशोकराव जमधडे, शांताराम जपे, बाबासाहेब कोते,आदींसह कार्यकर्ते ,पदाधिकारी, शेतकरी, नागरिक मोठ्या संख्येने उपस्थित होते.
0 Comments