आपल्या कसदार अभिनयातून असंख्य व्यक्तिरेखांना जिवंत करणारा आणि अनेक दशके रसिकांच्या मनावर अधिराज्य गाजवणारा एक प्रतिभावंत कलावंत आणि शेतकऱ्यांप्रती संवेदना असणारा दिलखुलास अभिनेता आपल्यातून निघून गेला आहे,” अशी भावना जलसंपदा तथा पालकमंत्री नामदार राधाकृष्ण विखे पाटील यांनी व्यक्त केली.आपल्या शोकसंदेशात मंत्री विखे पाटील यांनी म्हटले आहे की, “नानांचा अभिनय म्हणजे सहजता, वास्तववाद आणि प्रभावी अभिव्यक्तीचा अनोखा संगम होता. त्यांच्या भारदस्त आवाजाने, वैशिष्ट्यपूर्ण संवादफेकीने आणि भूमिकेशी एकरूप होण्याच्या विलक्षण शैलीने भारतीय चित्रपटसृष्टीला एक वेगळी उंची मिळवून दिली. त्यांनी साकारलेल्या अनेक भूमिका आणि संवाद पुढील कित्येक पिढ्यांच्या स्मरणात राहतील. मराठी रंगभूमी आणि हिंदी चित्रपटसृष्टीत केलेल्या अनेक भूमिकांमधून नानांनी आपले वेगळेपण सिध्द केले. ‘नटसम्राट’ असो की ‘क्रांतीवीर’ नानांच्या अभिनयाची छबी रसिकांच्या डोळ्यांसमोरून कधीही दूर होणार नाही.”नानांशी माझा केवळ परिचय नव्हता, तर अतिशय आपुलकीचे आणि मैत्रीचे ऋणानुबंध होते. त्यांच्याशी झालेल्या गप्पा, विविध विषयांवरील मनमोकळा संवाद आणि त्यांच्या सहवासातील क्षण आजही आठवणीत ताजे आहेत. लोकनेते पद्मभूषण डॉ. बाळासाहेब विखे पाटील यांनी कृषी आणि जलक्षेत्रामध्ये केलेल्या कामाप्रती त्यांना नितांत आदर होता, त्या दोघांचीही घनिष्ठ मैत्री होती. वेळोवेळी त्यांच्या कामाची आठवण नाना पाटेकर यांनी बोलून दाखविली. मनात असेल ते स्पष्टपणे बोलणारा, कोणताही दिखाऊपणा न करता माणुसकी जपणारा आणि सामाजिक प्रश्नांबद्दल तळमळ बाळगणारा हा माणूस मला नेहमीच भावला.”काही दिवसांपूर्वीच नानांची भेट झाली होती आणि आमचा दिलखुलास संवाद झाला. राज्यात जलसंपदा विभागाच्या माध्यमातून सुरू असलेल्या कामाची तसेच दुष्काळमुक्त महाराष्ट्र करण्याच्या सुरू असलेल्या प्रयत्नांमध्ये स्वतःहून योगदान देण्याची तयारी त्यांनी दर्शवली होती. कलाक्षेत्रातील उत्तुंग यशाबरोबरच नानांनी समाजसेवेचाही तितक्याच निष्ठेने ध्यास घेतला. ‘नाम फाउंडेशन’च्या माध्यमातून दुष्काळग्रस्त भागातील जलसंधारणाची कामे असोत किंवा संकटात सापडलेल्या शेतकरी कुटुंबांना दिलेला मदतीचा हात असो, त्यांच्या कार्यातून सामाजिक उत्तरदायित्वाची प्रचिती सातत्याने आली. प्रसिध्दीच्या झगमगाटापलीकडे जाऊन सर्वसामान्यांच्या वेदनांशी एकरूप होणारा हा कलावंत खऱ्या अर्थाने माणुसकीचा चेहरा होता.”नानांच्या निधनाने भारतीय कलाविश्‍वातील एक तेजस्वी पर्व संपुष्टात आले आहे. त्यांचे कलाक्षेत्रातील योगदान, समाजासाठी केलेले कार्य आणि आमच्यातील स्नेहबंधांच्या आठवणी कायम हृदयात जपल्या जातील. नानांना माझी भावपूर्ण श्रद्धांजली.” अशा शब्दांत मंत्री ना. राधाकृष्ण विखे पाटील यांनी त्यांना श्रध्दांजली अर्पण केली आहे. नाना पाटेकर यांच्या दुःखद निधनामुळे सर्वत्र हळहळ व्यक्त होत असून सर्व क्षेत्रांमधून त्यांना भावपूर्ण श्रद्धांजली अर्पण करण्यात येत आहे.
0 Comments