शिर्डी (प्रतिनिधी)-- राजकुमार गडकरी
श्री साईबाबा संस्थान विश्वस्त व्यवस्था, शिर्डी तथा सुमुखा लक्ष्मी व्यंकटेश्वरा चॅरिटेबल ट्रस्ट, म्हैसूर यांच्या संयुक्त विद्यमाने आयोजित करण्यात आलेल्या चार दिवसीय मोफत त्वचारोग तपासणी व उपचार शिबिराची आज उत्साहपूर्ण वातावरणात सांगता झाली.
दि. ११ ते १४ मे दरम्यान आयोजित या शिबिरामध्ये सुमारे १२०० हून अधिक रुग्णांची तपासणी करण्यात आली. विविध त्वचारोगांवरील सुमारे २५० प्रोसिजर यशस्वीरित्या पूर्ण करण्यात आल्या. शिबिरास रुग्णांचा उत्स्फूर्त प्रतिसाद लाभला.
शिबिराच्या समारोपप्रसंगी श्री साईबाबा संस्थानचे मुख्य कार्यकारी अधिकारी श्री. गोरक्ष गाडीलकर (भा.प्र.से.) यांच्या हस्ते सुमुखा लक्ष्मी ट्रस्ट, म्हैसूर येथील त्वचारोग तज्ज्ञ डॉ. शिवानी तसेच प्लास्टिक सर्जन डॉ. चंदन कुमार यांचा सन्मान करण्यात आला. याचबरोबर श्री साईनाथ रुग्णालयातील त्वचारोग तज्ज्ञ डॉ. दादासाहेब कांबळे, डॉ. श्रद्धा कोते आणि डॉ. विवेकानंद पाटील यांचाही उत्कृष्ट सेवेसाठी गौरव करण्यात आला.
“जागतिक नर्सिंग डे” निमित्त रुग्णसेवेत उल्लेखनीय कार्य करणाऱ्या श्री साईनाथ रुग्णालय व श्री साईबाबा हॉस्पिटलमधील नर्सिंग स्टाफचा “फ्लॉरेन्स नाइटिंगेल पुरस्कार” देऊन गौरव करण्यात आला. यामध्ये प्रणाली सोमन, अनिता कडूस, सुरेखा गायकवाड, तेरेसा गायकवाड, प्रीतम कुमार बोधक, सिताराम डांगे, उषा बोधक, किरण धोटे, सारिका गावडे, सीमा आहेर, शारदा जाधव, निलेश गाडेकर, कविता पंडित आणि प्रसाद पाबळे यांचा समावेश होता.
कार्यक्रमाचे प्रास्ताविक सहाय्यक अधिसेविका मंदा थोरात यांनी केले, तर सूत्रसंचालन जनसंपर्क अधिकारी सुरेश टोलमारे यांनी केले. यावेळी उपवैद्यकीय संचालक डॉ. प्रीतम वडगावे, सर्जन डॉ. राम नाईक, कार्यालयीन अधीक्षक काकासाहेब ढेमरे, अधिसेविका नजमा सय्यद यांच्यासह रुग्णालयातील डॉक्टर्स, कर्मचारी व नर्सिंग स्टाफ मोठ्या संख्येने उपस्थित होते.
0 Comments