बाभळेश्वर (प्रतिनिधी) कर्नाटकहून नाशिककडे निघालेल्या कुटुंबियांना तसेच दुसऱ्या वाहनात मध्य प्रदेशहून अहिल्यानगरला लग्नाला निघालेल्या पाहुण्यांना कोल्हार येथील पुलावर गुरुवारी (दि. 5) पहाटे अपघाताला सामोरे जावे लागले. दोन भरधाव वाहनांची समोरासमोर धडक होऊन झालेल्या भीषण अपघातात 14 जण जखमी झाल्याची घटना घडली.
यासंदर्भात सूत्रांकडून मिळालेल्या अधिक माहिती अशी की, नाशिक येथे वास्तव्यास असलेला नातू सैन्य भरतीसाठी आवश्यक असलेल्या सर्व परीक्षा उत्तीर्ण झाला. गुरुवारी त्याची अंतिम परीक्षा होती. नातवाला न सांगता अचानकपणे त्याला भेटून आश्चर्यचकित करण्यासाठी लखामपूरहून (कर्नाटक) निघालेल्या आजोबांसह सर्व कुटुंबियांचा कोल्हारच्या पुलावर अपघात झाला. त्यांच्या वाहनाची (क्रमांक केए.49, एम.2556) समोरून येणार्‍या कारला (क्रमांक एमपी.07, झेडएक्स.4230) समोरासमोर जबर धडक झाली. धडक इतकी प्रचंड होती की, कर्नाटकहून येणारे वाहन रस्त्यावर अक्षरशः उलटले होते. तर कारमधील प्रवासी हे गुनाहून (मध्य प्रदेश) अहिल्यानगरला नातेवाईकाच्या लग्नासाठी चालले होते.
या अपघातात 14 प्रवासी जखमी झाले. जखमींमध्ये महिला आणि छोट्या बालकांचा समावेश आहे. त्यांना किरकोळ स्वरूपाच्या दुखापती झाल्या. आजूबाजूच्या रहिवाशांनी तातडीने घटनास्थळी धाव घेऊन 11 जखमींना उपचारासाठी तत्काळ प्रवरा ग्रामीण रुग्णालयात दाखल केले. 3 जखमींना उपचारार्थ अहिल्यानगरला हलवले. स्थानिक नागरिकांनी रस्त्यावर उलटलेले वाहन दोराच्या साह्याने लोटून पूर्ववत केले. रस्त्याच्या मधोमध असलेली दोन्ही अपघातग्रस्त वाहने रस्त्याच्या कडेला केली. त्यामुळे खोळंबलेली वाहतूक सुरळीत होण्यास मोठी मदत झाली. अपघातामुळे बराच काळ वाहतूक विस्कळीत झाली होती. त्यामुळे महामार्गाच्या दुतर्फा वाहनांच्या लांबच लांब रांगा लागल्या होत्या. अत्यंत धीम्या गतीने दुतर्फा वाहतूक सुरू होती. घटनेच्या 5 तासानंतर सकाळी 11 वाजता वाहतूक पूर्णतः सुरळीत झाली.
या अपघातात प्रकाश बलअप्पा दलवाई, नागमीना मारुती हुलीकुई, शिदलीनअप्पा दलवाई, पूर्वा शिवानंद फुलवाई, अशोक देसाई फुलवाई, आकाश फकीरअप्पा कचेशयामी, सुनंदा मदरअप्पा अवली, प्रभूचरणअप्पा धमर, मालवा दलवाई, हनेमखा रामअप्पा कुलगोई, शिवानंद कुलगिरे (सर्व रा. लखामपूर, जि. बागलकोट, कर्नाटक) आणि संजय घनश्यामसिंग राठोड, मीरा संजय राठोड, स्नेहा बिरू राठोड (सर्व रा. गुना, मध्य प्रदेश) हे जखमी झाले आहेत. यामध्ये दोन्ही वाहनांच्या अग्रभागाचा चक्काचूर झाला असून अपघातग्रस्त वाहने राहुरी पोलीस ठाण्यात नेण्यात आली. अधिक तपास पोलीस करत आहेत.
0 Comments