दिलीप शिंदे
सोयगाव, दि.२१-- सामान्य नागरिकांना दर्जेदार आरोग्यसेवा उपलब्ध करून देण्याच्या उद्देशाने टीम समर्पण फाउंडेशन आणि मुख्यमंत्री सहाय्यता निधी व धर्मदाय रुग्णालय मदत कक्ष यांच्या संयुक्त विद्यमाने, महाराष्ट्र राज्याचे मुख्यमंत्री ना. देवेंद्र फडणवीस यांच्या वाढदिवसानिमित्त बुधवार, दि. २२ बुधवारी ग्रामीण रुग्णालय, सोयगाव येथे भव्य मोफत महाआरोग्य शिबिराचे आयोजन करण्यात आले आहे.
शिबीर सकाळी ९.०० ते सायंकाळी ५.०० या वेळेत होणार असून, नागरिकांना तज्ज्ञ डॉक्टरांकडून मोफत आरोग्य तपासणी, आवश्यकतेनुसार मोफत औषधे, ईसीजी, रक्तदाब, रक्तातील साखर, नेत्र, दंत, कान-नाक-घसा, हृदयरोग, किडनी, कर्करोग, अस्थिरोग, फिजिओथेरपी, मानसिक आरोग्य तसेच आयुर्वेदिक व होमिओपॅथिक सल्ला अशा विविध सुविधा उपलब्ध करून देण्यात येणारअसून याशिवाय जनरल मेडिसिन, जनरल सर्जरी, बालरोग, अस्थिरोग, हृदयरोग, स्त्रीरोग, त्वचारोग, नेत्ररोग, दंत, कान-नाक-घसा, मूत्रपिंड, कर्करोग, फिजिओथेरपी, मानसिक आरोग्य, आयुर्वेद आणि होमिओपॅथी या विविध शाखांतील तज्ज्ञ डॉक्टर नागरिकांची तपासणी करून मार्गदर्शन करणार आहेत.या महाआरोग्य शिबिराचे प्रमुख आकर्षण म्हणजे ५० लाखांपर्यंतच्या गंभीर आजारांवर मोफत निदान व उपचारासाठी मार्गदर्शन, तसेच ५६ प्रकारच्या रक्त तपासण्या आणि तज्ज्ञ डॉक्टरांकडून रोगनिदानाची सुविधा उपलब्ध होणार आहे. आर्थिक अडचणीमुळे उपचारापासून वंचित राहणाऱ्या गरजू रुग्णांसाठी हे शिबीर अत्यंत उपयुक्त ठरणार आहे. समाजातील कोणताही रुग्ण केवळ आर्थिक अडचणीमुळे उपचारापासून वंचित राहू नये, हा या उपक्रमामागील प्रमुख उद्देश आहे. सोयगाव तालुक्यातील सर्व नागरिकांनी, विशेषतः ज्येष्ठ नागरिक, महिला, शेतकरी, कामगार आणि गरजू रुग्णांनी या महाआरोग्य शिबिराचा जास्तीत जास्त लाभ घ्यावा असे आवाहन समर्पण फाऊंडेशन यांच्याकडून करण्यात आले आहे.
0 Comments