अहमदाबाद येथील एका साई भक्ताने 12 लाख 39 हजार रुपये किंमतीची सोन्याची गणेश मूर्ती साईना केली अर्पण!

शिर्डी ( प्रतिनिधी)-श्री साईबाबांवर देश-विदेशातील लाखो भाविकांची अढळ श्रद्धा असून देश विदेशातील लाखोच्या संख्येने साईभक्त शिर्डीत साई दर्शनाला येत असतात. साई दर्शनानंतर मोठ्या श्रद्धेने विविध दान श्री साई चरणी अर्पण करत असतात. असेच एका साई भक्ताने मोठ्या श्रद्धेनेशिर्डीत आपल्या परिवारासह येऊन साई दर्शन घेऊन सोमवारी श्री साई चरणी मोठे दान केले आहे. गुजरात राज्यातील अहमदाबाद येथील एका साईभक्ताने श्री साईबाबांच्या चरणी १०२.४५० ग्रॅम वजनाची सोन्याची गणेश मूर्ती अर्पण केली.

 सदर सोन्याच्या मूर्तीची किंमत रु. १२ लाख ३९ हजार ४४० इतकी असून, दानशूर साईभक्ताने आपले नाव जाहीर न करण्याची विनंती संस्थानकडे केली आहे. ही सोन्याची गणेश मूर्ती श्री साईबाबांच्या चरणी अर्पण केल्यानंतर श्री साईबाबा संस्थानच्या वतीने उप मुख्य कार्यकारी अधिकारी श्री. भिमराज दराडे यांनी देणगीदार साईभक्ताचा शाल प्रसाद देऊन सत्कार करून आभार व्यक्त केले. यावेळी या देणगीदार साई भक्तांचा परिवार उपस्थित होता.