श्रीक्षेत्र रुई येथील 132 व्या अखंड हरिनाम सप्ताहाची काल्याचे किर्तन व महाप्रसादांने मोठ्या उत्साहात सांगता!

शिर्डी (राजकुमार गडकरी) राहाता तालुक्यातील श्रीक्षेत्र रुई येथे श्री सद्गुरु गंगागिरीजी महाराज यांनी सन 1894 साली घालून दिलेल्या परंपरेनुसार सालाबाद प्रमाणे यावर्षीही मंगळवार दिनांक 29 जुलै 2025 ते बुधवार दिनांक 6 ऑगस्ट 2025 या कालावधीत 132 वा अखंड हरिनाम सप्ताह तथा ग्रंथराज ज्ञानेश्वरी पारायण सोहळाची व किर्तन महोत्सवाची मोठ्या उत्साहात व आनंदात काल्याच्या कीर्तन आणि महाप्रसादानंतर ‌येथे सांगता झाली.  श्री क्षेत्र रुई येथे दर वर्षाप्रमाणे याही वर्षी 132 वा अखंड हरिनाम सप्ताह निमित्त मंगळवार दिनांक 29 जुलै रोजी या अखंड हरिनाम सप्ताहास श्री हनुमान मंदिराच्या प्रांगणात मंगल कलश स्थापना व पंचदीप प्रज्वलन, तसेच ग्रंथ ,विना, टाळ, व मृदंग यांचे पूजन सद्गुरु महंत प.पू. रमेशगिरीजी महाराज ,(संत जनार्दन स्वामी आश्रम कोपरगाव बेट) व शिर्डीचे संत ज्ञानेश्वर माऊली आश्रम येथील श्री श्री 1008 महामंडलेश्वर श्री काशिकानंद महाराज यांच्या शुभहस्ते पूजन करून प्रारंभ झाला होता. 

येथील मोठी परंपरा असणाऱ्या या अखंड हरीनाम सप्ताह निमित्त दररोज पहाटे काकडा भजन, सकाळी सात ते अकरा ग्रंथराज ज्ञानेश्वरी चे पारायण, त्यानंतर गाथा भजन, वारकरी भजन, सायंकाळी पाच ते सात हरिपाठ व नऊ ते 11 कीर्तन असे धार्मिक कार्यक्रम दररोज संपन्न झाले. येथे किर्तन महोत्सवामध्ये ह भ प हेमलता ताई पिंगळे महाराज, ह भ प संजयजी महाराज जगताप, भऊरकर ,ह भ प निवृत्ती महाराज देशमुख ,इंदुरीकर, ह भ प गोरक्षनाथ महाराज देठे, ज्ञानेश्वर महाराज शिंदे ,ह भ प श्रीकांत महाराज साखरे, यांनी ह भ प विठ्ठलपंत गोंडे महाराज, ह भ प नित्यानंदगिरीजी महाराज, यांचे नऊ ते अकरा यादरम्यान दररोज किर्तन संपन्न झाले. त्यानंतर बुधवार सहा ऑगस्ट 2025 रोजी सकाळी 11 ते एक या दरम्यान ह भ प पांडुरंग महाराज गिरी यांचे सुश्राव्य असे काल्याचे किर्तन संपन्न झाले. कीर्तनानंतर महाराजांच्या हस्ते दहीहंडी फोडण्यात आली. यावेळी महाराजांच्या हस्ते येथील दानशूर ग्रामसेवक सांगळे यांचा सत्कार करण्यात आला. त्यानंतर श्रीमती नादराबाई देशमुख विद्यालयाच्या प्रांगणात महाप्रसादाचा कार्यक्रम संपन्न झाला. हजारो भाविकांनी या महाप्रसादाचा लाभ घेतला.या विद्यालयाच्या विद्यार्थ्यांनी भाविकांना महाप्रसाद वाढण्याचे महत्त्वाचे व मोठे काम केले. तत्पूर्वी दहीहंडी फोडल्यानंतर काल्याचा प्रसाद ट्रॅक्टर मधून भाविकांना वाटण्यात आला. या सप्ताह कार्यक्रमानिमित्त मंदिर व परिसरात आकर्षक मंडप व विद्युत रोषणाई करण्यात आलेली होती. हा अखंड हरिनाम सप्ताह यशस्वीतेसाठी समस्त रुई ग्रामस्थ, सप्ताह कमिटी,भजनी मंडळी ,तरुण मंडळ, भाविकांनी मोठे परिश्रम घेतले. बुधवार सहा गोष्ट रोजी रात्री नऊ वाजता ह भ प गोविंद महाराज गायकवाड यांचा प्रसिद्ध भारुडाचा कार्यक्रम संपन्न होणार आहे. तरी भाविकांनी या भारुड कार्यक्रमाचा लाभ घ्यावा असे आवाहन समस्त ग्रामस्थ व सप्ताह कमिटीने केले आहे.