दिलीप शिंदे सोयगाव
सोयगाव दि.02 - शासनाच्या ' लाडकी बहीण' योजनेची लिंक मिळत नसल्याने सोयगाव तालुक्यातील अनेक महिला लाभार्थी प्रतीक्षेत आहेत. त्यामुळे अर्ज भरण्यासाठी निवडणुकीच्या आचारसंहितेपासून बंद असलेले संकेतस्थळ (वेबसाईट) आता विधानसभेच्या निवडणुकीनंतरही सुरू झाले नसल्याने हे संकेतस्थळ कधी सुरू होणार याकडे वंचित लाडक्या बहिणींचे लक्ष लागून आहे.
पोर्टल कधी सुरु होईल हे सांगता येणे शक्य नाही
दरम्यान, लिंक बंद असल्याबाबत संबंधित प्रशासनाकडे चौकशी केली असता, ही लिंक जेव्हापासून बंद झाली, तेव्हापासून सुरू झाली नाही आणि पोर्टल केव्हा सुरू होईल, हे मात्र सांगता येणार नसल्याची माहिती देण्यात आली.परंतु, योजनेची लिंक अथवा पोर्टल सुरू नसल्याने अर्ज कुठे व कुणाकडे करायचा?, असा प्रश्न अनेक युवतींना उपस्थित होत आहे.
--योजनेमुळे विधानसभा निवडणुकीत मिळविले यश--
विधानसभा निवडणुकीपूर्वी राज्य शासनाने मुख्यमंत्री लाडकी बहीण योजना सुरू केली होती. यासाठी प्रत्येक कुटुंबातील दोन महिला, उत्पन्न अडीच लाखांच्या आत, चारचाकी वाहन नको, लाभार्थी नोकरदार व करदाता नसेल, अशा अनेक प्रकारच्या अटी व शर्ती घालून दिल्या होत्या. महायुती सरकारने या योजनेचा प्रसार-प्रचार करून विधानसभा निवडणुकीत घवघवीत यश मिळवीत मोठ्या मताधिक्याने सत्ता मिळवली.परंतु आता 21-वर्ष वय पूर्ण झालेल्या पात्र 'लाडक्या बहिणीं'ना या योजनेचा अर्ज भरण्यासाठी अडचणी येत आहेत.
0 Comments