श्रीरामनवमी उत्सवानिमित्त नाशिक–सिन्नर रोडवर साईपालखी सोहळ्याचे संस्थानतर्फे उत्साहात स्वागत‌!

मुख्य कार्यकारी अधिकारी गोरक्ष गाडीलकर व उपमुख्य कार्यकारी अधिकारी भीमराज दराडे यांनीही साई पालखीत घेतला सहभाग!

शिर्डी( राजकुमार गडकरी)-

 श्री साईबाबा संस्थानतर्फे श्रीरामनवमी उत्सवाच्या पार्श्वभूमीवर मुंबईवरून पायी येणाऱ्या साईभक्तांच्या पालखी सोहळ्यांचे नाशिक–सिन्नर रोडवर उत्साहात स्वागत करण्यात आले. साईसंस्थानचे मुख्य कार्यकारी अधिकारी गोरक्ष गाडिलकर व उपमुख्य कार्यकारी अधिकारी भीमराज दराडे यांनी शिर्डीला येणारे या साई पालखी मंडळांना भेट देत साई पालख्यांचे स्वागत केले. भाविकांशी , साई पदयात्रींशी संवाद साधला. त्यांची विचारपूस केली.

गेल्या वर्षीप्रमाणेच यंदाही परंपरा जपत मुख्य कार्यकारी अधिकारी व उपमुख्य कार्यकारी अधिकारी यांनी पालखी सोहळ्यात काही अंतर पदयात्रींसमवेत पायी चालत भक्तिभावाचा अनुभव घेतला. त्यांच्या या उपक्रमाचे भाविकांकडून उत्स्फूर्त स्वागत करण्यात आले.

यावेळी मुख्य कार्यकारी अधिकारी गोरक्ष गाडिलकर व त्यांच्या पत्नी सौ. वंदना गाडिलकर यांच्या हस्ते पालखीचे विधिवत पूजन करण्यात आले. या प्रसंगी साईभक्तांच्या सेवेसाठी संस्थान सदैव तत्पर असल्याचा संदेश देण्यात आला. याप्रसंगी श्री साईबाबा संस्थानचे अधिकारी व कर्मचारी उपस्थित होते.

यावर्षी श्री साईबाबा संस्थानतर्फे पालखी पदयात्रेकरिता विविध ठिकाणी कीर्तन / प्रवचनांचे आयोजन करण्यात आले असून, पदयात्रींसाठी पिण्याच्या पाण्याची व्यवस्था, फिरत्या शौचालयांची सुविधा तसेच इतर मूलभूत सोयी-सुविधा उपलब्ध करून देण्यात आल्या आहेत. या उपक्रमांमुळे हजारो पदयात्रींना मोठा दिलासा मिळत आहे.

श्रीरामनवमीच्या पावन पर्वात साईभक्तांच्या या पदयात्रेला साईसंस्थानतर्फे केलेले स्वागत हे श्रद्धा, सेवा आणि समर्पणाची परंपरा अधिक दृढ करणारे ठरत आहे. या साई पालखी व साई पदयात्रींचे संस्थान तर्फे स्वागत झाल्यामुळे साई पदयात्रींमधून मोठे समाधान व आनंद व्यक्त होत आहे.