भारतीय संस्कृतीत कुंभमेळ्याला धार्मिक, आध्यात्मिक आणि सांस्कृतिकदृष्ट्या अत्यंत महत्त्वाचे स्थान आहे. लाखो-कोट्यवधी भाविक, साधू-संत, आखाड्यांतील संन्यासी आणि श्रद्धाळू लोक पवित्र नद्यांमध्ये स्नान करण्यासाठी, संत-महात्म्यांचे दर्शन घेण्यासाठी आणि आध्यात्मिक साधनेसाठी कुंभमेळ्यात सहभागी होतात. हा केवळ धार्मिक उत्सव नसून भारतीय परंपरा, श्रद्धा आणि सामाजिक एकतेचे भव्य प्रतीक आहे. नाशिक त्रिंबक येथे सिंहस्थ कुंभमेळ्याचे नुकतेच ध्वजारोहण झाले आहे. येथे होणारा हा कुंभमेळा त्रिखंडी आहे. तो सर्वात मोठा आध्यात्मिक पर्व समजला जात आहे. असे प्रसिद्ध कीर्तनकार ह भ प संजयजी महाराज जगताप यांनी सांगितले आहे.
ह भ प संजय जी महाराज जगताप यांनी पुढे म्हटले की,
कुंभ' म्हणजे कलश किंवा घडा आणि मेळा' म्हणजे लोकांचा मोठा मेळावा,! धार्मिक परंपरेनुसार, ठरावीक ज्योतिषीय ग्रहस्थितीच्या वेळी भारतातील चार पवित्र तीर्थक्षेत्रांमध्ये कुंभमेळ्याचे आयोजन केले जाते.
कुंभमेळ्याची पौराणिक पार्श्वभूमी समुद्रमंथनाच्या कथेशी जोडलेली आहे. देव आणि दानवांनी केलेल्या समुद्रमंथनातून अमृतकलश प्राप्त झाला. त्या अमृतासाठी झालेल्या संघर्षाच्या कथेत अमृताचे थेंब चार ठिकाणी पडल्याची श्रद्धा प्रचलित आहे. ही चार ठिकाणे म्हणजे प्रयागराज, हरिद्वार, उज्जैन आणि नाशिक-त्र्यंबकेश्वर असून कुंभमेळ्यात पवित्र नदीत स्नान केल्याने पापक्षालन होते, मनाची शुद्धी होते आणि आध्यात्मिक पुण्यप्राप्ती होते, अशी हिंदू धर्मीयांची श्रद्धा आहे. या काळात धार्मिक प्रवचने, भजन-कीर्तन, साधना, दानधर्म आणि संत-महात्म्यांचे दर्शन असे विविध कार्यक्रम होतात. ते केल्याने अधिक पुण्य प्राप्त होते अशी भावना आहे. असे सांगत ह भ प संजय जी महाराज जगताप म्हणाले की, श्रद्धा, आत्मशुद्धी, संयम, सेवा आणि भारतीय संस्कृतीशी टिकून राहणे हा या मंडळाचा मुख्य संदेश असून साधारणतः बारा वर्षांच्या चक्रात वरील चार ठिकाणी ग्रहस्थितीनुसार कुंभमेळे आयोजित होतात. मात्र, प्रत्येक ठिकाणच्या आयोजनाचे अचूक वर्ष आणि कालावधी स्वतंत्रपणे निश्चित केला जातो.
प्रयागराज उत्तर प्रदेश येथे गंगा, यमुना आणि अदृश्य मानली जाणारी सरस्वती यांचा त्रिवेणी संगमावर हा कुंभमेळा भरतो. तर
हरिद्वार (उत्तराखंड) गंगा नदी किनारी तसेच नाशिक व त्र्यंबकेश्वर (महाराष्ट्र) येथे गोदावरी नदी किनारी आणि
उज्जैन( मध्य प्रदेश) क्षिप्रा नदी किनारी हा कुंभमेळा भरत असतो.नाशिक आणि त्र्यंबकेश्वर येथे भरणाऱ्या कुंभमेळ्याला *सिंहस्थ कुंभमेळा’ असे म्हणतात. कारण या कुंभ पर्वाचा संबंध ज्योतिष शास्त्रानुसार गुरु ग्रहाच्या सिंह राशीतील प्रवेशाशी जोडला जातो.
या नावामागे भारतीय ज्योतिषपरंपरा, धार्मिक श्रद्धा आणि प्राचीन सांस्कृतिक पौराणिक परंपरा यांचा संबंध आहे.‘सिंहस्थ’ हा शब्द दोन भागांनी बनलेला आहे.
सिंह’ म्हणजे सिंह रास आणि स्थ’ म्हणजे स्थित असणे किंवा वास्तव्य करणे
त्यामुळे गुरू ग्रहाच्या सिंह राशीतील स्थितीशी संबंधित कुंभपर्वाला ‘सिंहस्थ कुंभमेळा’ असे म्हटले जाते.भारतीय ज्योतिषपरंपरेनुसार गुरू ग्रहाला एका राशीतून दुसऱ्या राशीत जाण्यास साधारण एक वर्ष लागते. बारा राशींमधून त्याचे भ्रमण पूर्ण होण्यास जवळपास बारा वर्षे लागतात. गुरू ग्रहाच्या सिंह राशीतील स्थितीशी नाशिक-त्र्यंबकेश्वर येथील सिंहस्थ कुंभपर्वाची परंपरा जोडलेली आहे.
त्यामुळे साधारण बारा वर्षांच्या अंतराने या तीर्थक्षेत्रात कुंभमेळा भरतो. सिंहस्थ कुंभमेळा हा केवळ ग्रहांच्या स्थितीशी संबंधित धार्मिक सोहळा नाही, तर आत्मचिंतन, साधना आणि सामूहिक आध्यात्मिक जागृतीची संधी आहे. कारण सिंह रास परंपरेतील प्रतीकात्मक अर्थाने धैर्य, तेज आणि सामर्थ्याची आठवण करून देते.तर
गुरू ग्रह ज्ञान, सद्बुद्धी आणि आध्यात्मिक मार्गदर्शनाशी जोडला जातो.गोदावरी स्नान धार्मिक श्रद्धेनुसार आत्मशुद्धी आणि नव्या संकल्पाचे प्रतीक आहे. तसेच या काळात साधू-संतांचा सहवास सत्संग, विचारमंथन आणि आत्मचिंतनाची संधी उपलब्ध करून देतो.
अशा प्रकारे, सिंहस्थ कुंभमेळा आपल्याला श्रद्धेबरोबरच ज्ञान, संयम, सदाचार आणि आत्मोन्नती यांचे महत्त्वही शिकवतो.
कुंभमेळ्याचा प्रारंभ व धर्मध्वजारोहण ३१ ऑक्टोबर २०२६ झाले आहे.
पहिले अमृतस्नान पर्वणी २ ऑगस्ट २०२७
दुसरी अमृतस्नान पर्वणी ३१ ऑगस्ट २०२७
नाशिक येथील तिसरे अमृतस्नान पर्वणी ११ सप्टेंबर २०२७
त्र्यंबकेश्वर येथील तिसरी अमृतस्नान पर्वणी १२ सप्टेंबर २०२७ ला असून
कुंभमेळ्याचा समारोप व धर्मध्वजावतरण २४ जुलै २०२८ला आहे. कुंभमेळ्याचा प्रारंभ ३१ ऑक्टोबर २०२६ रोजी होणार असला, तरी मुख्य अमृतस्नान पर्वण्या ऑगस्ट आणि सप्टेंबर २०२७ मध्ये आहेत. नाशिक आणि त्र्यंबकेश्वर येथील तिसऱ्या अमृतस्नानाची तारीख वेगवेगळी आहे.
नाशिक आणि त्र्यंबकेश्वर येथील कुंभमेळ्याचे एक वैशिष्ट्य म्हणजे वैष्णव आणि शैव आखाड्यांच्या स्नानाची व्यवस्था स्वतंत्रपणे केली जाते.
कुंभमेळा आपल्याला केवळ नदीत स्नान करण्याचा संदेश देत नाही, तर अंतःकरण शुद्ध करण्याची प्रेरणाही देतो. या कुंभमेळ्यातून परमेश्वरावरील विश्वास दृढ होऊन श्रद्धा वाढते. आपल्या चुका ओळखून त्यांत सुधारणा करता येते आत्मशुद्धी होते. मन, विचार आणि आचरण यांमध्ये शुद्धता आणत साधना करता येते. यात्रेकरू, साधू-संत आणि गरजू व्यक्तींना मदत करुन सेवा करता येते. भाषा, प्रांत आणि सामाजिक भेद बाजूला ठेवून एकत्र येता येते. गोदावरी नदी स्वच्छ ठेवणे आणि प्लास्टिक व कचऱ्याचा वापर कमी करून पर्यावरण संवर्धन साधता येते.
कुंभमेळ्यात सहभागी होताना धार्मिक श्रद्धेबरोबरच स्वच्छता, सुरक्षितता आणि सामाजिक जबाबदारी यांचेही भान ठेवणे आवश्यक आहे.नाशिकचा सिंहस्थ कुंभमेळा हा महाराष्ट्राच्या धार्मिक आणि सांस्कृतिक परंपरेचा गौरव आहे.
कुंभमेळ्याच्या निमित्ताने गोदावरीचे पावित्र्य जपणे, संतांच्या विचारांतून प्रेरणा घेणे आणि समाजसेवेचा संकल्प करणे, हीच या पर्वाची खरी फलश्रुती ठरू शकते. असे मत ह भ प संजयजी महाराज जगताप यांनी व्यक्त केले आहे.
0 Comments