शिर्डी (राजकुमार गडकरी)
विकासाचे सोडाच केवळ हसून सभा करणाऱ्या संगमनेरच्या नेत्यांनी काहीच केलं नाही. त्यांच्या तालुक्यातच त्यांची निष्क्रियता उघड झाली आहे. असे असतानाही राजकारण करण्यासाठी ठेकेदार आणि माफियांच्या जीवावर काही लोकांना हाताशी धरून ते आपल्या भागात येत आहेत .परंतु या भागातील जनता त्यांना थारा देणार नाही. राहाता तालुक्यातील जनता ही त्यांच्या खोट्या भूलथापांना कधीही बळी पडणार नाही .असे प्रतिपादन राज्याचे महसूल मंत्री नामदार राधाकृष्ण विखे पाटील यांनी राहाता येथे केले.
राहाता येथे शिर्डी विधानसभा मतदारसंघात महायुतीच्या वतीने महसूल मंत्री नामदार राधाकृष्ण विखे पाटील यांनी उमेदवारी अर्ज दाखल केल्यानंतर सिद्ध संकल्प मंगल कार्यालयात झालेल्या विजयी संकल्प मेळाव्यातून नामदार राधाकृष्ण विखे पाटील हे पदाधिकारी ,कार्यकर्ते आणि मतदारांशी संवाद साधताना बोलत होते.
या कार्यक्रमा अगोदर राहता शहरातून कार्यकर्त्यांनी भव्य असे रॅली काढली होती. वेगवेगळ्या गावातूनही मोटरसायकल रॅली आल्या होत्या. घोषणांनी संपूर्ण परिसर दणाणून गेला होता. या राहता शहरातील रॅलीमध्ये नामदार विखे पाटील ही दुचाकी वर बसून सहभागी झाले होते. व्यासपीठावर त्यांचे आगमन होताच लाडक्या बहिणीने नामदार विखे पाटील यांचे राख्या बांधून जोरदार स्वागत केले.
या कार्यक्रमात नामदार राधाकृष्ण विखे पाटील पुढे म्हणाले की, महायुती सरकारच्या माध्यमातून या मतदारसंघातील खंडकरी शेतकऱ्यांचा प्रश्न सोडवून या शेतकऱ्यांना न्याय देता आला. निळवंड्याच्या कालव्याचे पाणी दिलेल्या शब्दाप्रमाणे येथे आणून दाखवले. त्याचप्रमाणे शेती महामंडळाची सुमारे पाचशे एकर जागा एमआयडीसीला देऊन या मतदारसंघात औद्योगिक वसाहतीची उभारणी सुरू केली. जवळजवळ तीन ते चार हजार कोटी गुंतवणूक एमआयडीसीत होणार असून पाच ते सात हजार तरुण यांना रोजगार मिळणार आहे. आमदार आशुतोष काळे यांच्या मागणीनुसार त्यांनाही एमआयडीसीसाठी जागा दिली.
यावेळी मा.खा. डॉक्टर सुजय विखे पाटील यांनी बोलताना सांगितले की, मी चार सभा तेथे घेतल्या तर त्यांचे सिंहासन हलले. ही तर सुरुवात आहे. आता इकडे येऊन तुम्ही काय करणार! ज्यांच्यासाठी येत आहेत त्यांच्याकडूनही काही होणार नाही. हे या तालुक्यातील जनतेला माहित आहे. मात्र आमच्या तालुक्यात येऊन खालच्या पातळीवर जाऊन बोलला तर आम्ही आता कायद्याच्या सर्व चौकटी सोडून उत्तर दिल्याशिवाय राहणार नाही. आमची सहनशीलता ही कमजोरी समजू नका .असा इशाराही त्यांनी यावेळी दिला.
यावेळी माजी मंत्री अण्णासाहेब म्हस्के पाटील, आमदार आशुतोष काळे, मौलाना रऊफ, सुरेंद्र थोरात यांची भाषणे झाली. या कार्यक्रमाला राहता तालुक्यातील विविध संस्थांचे पदाधिकारी, सरपंच, उपसरपंच, चेअरमन, विविध पदाधिकारी, कार्यकर्ते, महिला, युवक मोठ्या संख्येने उपस्थित होते.
0 Comments